:lvg: | 23/10/2010
Palla, xuncos, madeira e corres son os produtos empregados na confección das obras que estes días se amosan na casa de cultura de Portosín.
A cestería galega está a atravesar na actualidade un dos seus peores momentos, pois atópase en serio perigo de extinción. O abandono das formas tradicionais de vida campesiña, a invasión do plástico e a produción en cadea de todo tipo de artigos nos países asiáticos están a afogar unha actividade que no pasado tivo un peso moi importante en Galicia. Para evitar que esta forma de arte se perda definitivamente, o Centro de Artesanía e Deseño da Deputación de Lugo montou unha exposición de obxectos feitos con palla, xuncos, corres e madeira que estes días recala na casa de cultura de Portosín.
A inauguración da mostra tivo lugar na tarde do xoves e contou coa asistencia do asesor técnico do Instituto Lucense de Desenvolvemento Económico e Social, José Carlos Ferreiro Otero, que estivo acompañado polo alcalde de Porto do Son, Xoán Pastor Rodríguez. Os dous destacaron a importancia que ten esta colección como fórmula de divulgación dunha técnica, a da fabricación de obxectos a partir de fibras vexetais, que acompañou aos galegos desde tempos inmemoriais.
O que se amosa nesta exposición é unha selección de obxectos de cestería representativos de toda a xeografía galega. Así, por exemplo, no que ás obras feitas con palla se refire, forman parte da mostra aberta na casa de cultura de Portosín cestas para o seu uso no fogar e tamén para as tarefas de labranza. Representativas da comarca de Barbanza están o sombreiro feito en Mazaricos e unha cestiña de xuncos e aros típica da localidade muradá de Louro.
Pesca e agricultura
É interesante tamén a parte da exposición que está dedicada aos artigos realizados con xuncos. Nasas para a pesca de río feitas en Navia de Suarna e para a captura de anguías chegadas desde Ourense, cestos para a vendima e para outros usos de carácter agrícola e ata un capelo empregado antigamente polos pastores para protexerse da chuvia forman parte desta mostra.
Outra das seccións é a de madeira rachada. Nela tamén hai nasas, empregadas sobre todo para o marisqueo e para a captura de polbo, pero quizais o máis destacable son curiosos obxectos como un abano para avivar o lume, un bozo para o gando ou as tradicionais patelas.
Completan a exposición que o xoves se abriu na casa de cultura de Portosín unha serie de obxectos feitos coa técnica da cestería de corres. A pesca e a agricultura seguen a ser os usos máis comúns destes recipientes, pero tamén hai axóuxeres feitos de vimbios que proceden de Vigo.
Esta colección, de gran valor etnográfico, permanecerá na localidade sonense ata o 14 de novembro. Poderá visitarse de luns a venres, desde as 8.30 ata as 13.30 horas e tamén entre as cinco e as oito da tarde.
A cestería galega está a atravesar na actualidade un dos seus peores momentos, pois atópase en serio perigo de extinción. O abandono das formas tradicionais de vida campesiña, a invasión do plástico e a produción en cadea de todo tipo de artigos nos países asiáticos están a afogar unha actividade que no pasado tivo un peso moi importante en Galicia. Para evitar que esta forma de arte se perda definitivamente, o Centro de Artesanía e Deseño da Deputación de Lugo montou unha exposición de obxectos feitos con palla, xuncos, corres e madeira que estes días recala na casa de cultura de Portosín.
A inauguración da mostra tivo lugar na tarde do xoves e contou coa asistencia do asesor técnico do Instituto Lucense de Desenvolvemento Económico e Social, José Carlos Ferreiro Otero, que estivo acompañado polo alcalde de Porto do Son, Xoán Pastor Rodríguez. Os dous destacaron a importancia que ten esta colección como fórmula de divulgación dunha técnica, a da fabricación de obxectos a partir de fibras vexetais, que acompañou aos galegos desde tempos inmemoriais.
O que se amosa nesta exposición é unha selección de obxectos de cestería representativos de toda a xeografía galega. Así, por exemplo, no que ás obras feitas con palla se refire, forman parte da mostra aberta na casa de cultura de Portosín cestas para o seu uso no fogar e tamén para as tarefas de labranza. Representativas da comarca de Barbanza están o sombreiro feito en Mazaricos e unha cestiña de xuncos e aros típica da localidade muradá de Louro.
Pesca e agricultura
É interesante tamén a parte da exposición que está dedicada aos artigos realizados con xuncos. Nasas para a pesca de río feitas en Navia de Suarna e para a captura de anguías chegadas desde Ourense, cestos para a vendima e para outros usos de carácter agrícola e ata un capelo empregado antigamente polos pastores para protexerse da chuvia forman parte desta mostra.
Outra das seccións é a de madeira rachada. Nela tamén hai nasas, empregadas sobre todo para o marisqueo e para a captura de polbo, pero quizais o máis destacable son curiosos obxectos como un abano para avivar o lume, un bozo para o gando ou as tradicionais patelas.
Completan a exposición que o xoves se abriu na casa de cultura de Portosín unha serie de obxectos feitos coa técnica da cestería de corres. A pesca e a agricultura seguen a ser os usos máis comúns destes recipientes, pero tamén hai axóuxeres feitos de vimbios que proceden de Vigo.
Esta colección, de gran valor etnográfico, permanecerá na localidade sonense ata o 14 de novembro. Poderá visitarse de luns a venres, desde as 8.30 ata as 13.30 horas e tamén entre as cinco e as oito da tarde.
0 comentarios:
Publicar un comentario