A raíz dalgúns comentarios verquidos nesta bitácora por varios anónimos, nalgúns casos tendenciosos e noutros faltando á verdade apostas, Francisco Calo García, promotor das homenaxes que dende o ano 2000 se-lle ven tributando a Xenerosa Vidal, Francisca Carou, Ramona Suárez, Rosa Cadórniga e Antonio Sobrado, máis coñecidos coma «os mortos da ponte de Cans», manifesta o seguinte:
É totalmente FALSO tal é como refire o anónimo do día
16 de outubro das 20:22, que o BNG celebre este acto dende fai anos ou que fose o seu promotor. É certo que naquela época militaba neste partido, pero iso non lle dá dereito a faltar á verdade. NUNCA promovín ditas homenaxes coma militante, se non coma veciño de Nebra e descendente daquela xente, de aí que XAMAIS usase símbolos nacionalistas e porque dende un principio sempre quixen que fose un ACTO ABERTO E PÚBLICO.
Unha MENTIRA non se converte en VERDADE por moito que se conte mil veces, tal e como profetizaba un tal Joseph Goebbels. Querer PRESUMIR de se-los promotores do acto e que pagase eu as flores e botarlle demasiada CARA... só me faltaba como fan agora, que enriba lles pagase a cinta co seu anagrama. É verdade que antes tamén lle poñía unha, pero SEMPRE era anónima e só levaba unha cita en lembranza das vítimas. A diferenza é substancial!!!
Tal vez o meu error foi darlles confianza a quen demostraron ao final que non a merecían. Do 2001 ó 2005 permitinlles que me imprimisen os carteis da convocatoria, que sempre eran editados polo meu fillo e que levasen o anagrama do BNG. Isto non quere dicir fosen os promotores do evento, ou si?
No ano 2006 decidín prescindir xa desa colaboración e así lles foi comunicado polo meu fillo ante a miña ausencia. Houbo xente á que non lles gustou, especialmente ó presidente da comunidade, pero unha intervención dun dos «históricos militantes» que coñece a verdade de todo isto, cortou de raíz a cuestión e aceptouse a miña decisión irrebocable.
O ano seguinte a raíz da miña baixa xa coma militante -motivada entre outras cousas porque o presidente da comunidade «de novo el polo medio» co visto e prace da Consellería do Medio Rural expropiáronlle ilegalmente un agro a meu pai con unha pista-, ante a miña ausencia de novo por motivos laborais «atopábame en Carboneras-Almeria» comunícolle á familia que non estaban «obrigados» a informalos directamente da convocatoria do acto. Iso molestoulles tanto, que incluso me chamaron á «orde» por teléfono dende a sede. A pesar de que-lles deixei ben claro que o acto seguía sendo ABERTO e que non tiña inconveniente en que se sumasen, foi cando decidiron aproveitar esa ausencia para facela súa primeira contra-homenaxe.
Con todo iso teño certas dúbidas, primeiro porque dubido que se dirixiran a algún dos descendentes para comunicarlles a súa decisión e segundo, porque non teño claro que convocou o acto, xa que a prensa non menciona explicitamente ó BNG e só di que falou o presidente da comunidade e que
-no faltaron a la cita los ediles no adscritos de O Son. Eses edís eran os expulsados polo BNG por no acatalo pacto de Santiago subscrito co PSOE e por negarse a propiciala reelección de Ramón Quintáns.
O máis curioso é que o máis acérrimo defensor de que todo isto foi promovido dende un principio polo BNG, é precisamente o presidente da comunidade. Ollase que ten moi mala memoria, primeiro porque se esquece que el e outros que opinan igual non estiveron na primeira homenaxe e porque se esquece do que dixo nesta entrevista cando non me saia do «seu guión»:
- ¿De quen foi a idea?
-Dun veciño de Nebra, coñecido como Paco de Martelo, que tivo que emigrar e agora vive na illa de Mallorca.
Xa o di o refrán:
Onde hai papeis, calan barbas.
A única verdade que di a medias o anónimo de referencia e sobre o acto de Ramón Sampedro, aínda que o debo corrixir, agora o BNG non é o promotor da homenaxe e coido que nin tan sequera aparece o seu nome no cartel. Iso si, igual que facemos moitos, varios militantes fan acto de presencia.
Pregunta o anónimo do 13 de outubro das 11:40, por que se fan dúas homenaxes? e se non sería mellor unificalo todo nunha?...
Pola miña parte nunca houbo problema e así se fixo o ano 2008, cando se inaugurou o segundo monólito coa placa que recolle o nome das cinco persoas abatidas e unha pequena lenda dos feitos. A idea partiu Manuel Tomé, alcalde do Concello por aquel entón e despois de que falase con el para ver de resaltala beirarrúa fronte ao monólito. Ese ano era a primeira vez que un alcalde lle daba un aire institucional á homenaxe e tamén, que un militante «sacou» a bandeira nacionalista, cousa que persoalmente non me gustou nada.
Rematado o acto e xa no Bar Universal de Nebra, algúns militantes dedicáronse a descualificar a Tomé e a queixarse pola súa presencia no acto. Alí mesmo dixeron que non querían volver a coincidir outra vez con el e que non quería que se-lles fose das mans a homenaxe como lles pasou co de Ramón Sampedro. Se os actos sempre foron abertos, a qué se debía esa «carrapincha»? Querían que fose abertos só para os da súa «corda»?
O ano pasado Manuel Tomé xa non era o problema, pero aínda así deron en seguir coa súa teima. Ao seu acto asiste Xoán Pastor, en calidade de alcalde, e non se cortan un pelo en criticalas políticas do PSOE «lembre que gobernaban en coalición con dito partido» e de Feijoo. Facendo miñas unhas verbas que me comentou Pastor, que tamén acudiu ao meu acto, tamén digo que para falar da política actual teñen 364 días e 23 horas e media, polo que nesa media hora ben podían falar das cinco vítimas e dos feitos que en teoría os leva a Cans. Noutra ocasión, no antigo Chuza un asistente ao seu acto tamén se estrañou que se esquecesen das vítimas e se dedicasen a criticar a Zapatero e Feijoo.
Con este comentario coido que respondo a este anónimo, máis aos que teñen dúbidas sobre quen é o que mestura a política e mais ao que nesta outra
entrada asina como Olveira, pero usando unha URL que non era da súa propiedade.
doce anos lembrándoos
24/10/2011 23:37:06
Paco do Martelo
