27 mayo 2012

Barbantia acada 75 suplementos acompañada por Rexina Vega

:logo-lvg: | Barbanza

A escritora de Vigo presentou a novela «Dark butterfly»

Barbantia viviu o venres todo un acontecemento, como foi chegar ao número 75 do suplemento que publica en La Voz de Barbanza: sete anos e medio de existencia da publicación. Fiel ao costume que se implantou cando empezou a andaina da entidade e o periódico, o último venres de maio, antonte, foron convocados os socios e o público en xeral na Tenda Escola Deán, pois, ademais de presentar o suplemento, comparecía así mesmo a escritora viguesa Rexina Vega, para dar a coñecer a súa última obra, Dark butterfly, publicada por Xerais.

Amparo Cerecedo, presidenta da Asociación do Pequeno Comercio da Pobra, sinalou que tanto ela como a súa directiva estaban encantados de colaborar coas actividades culturais; agradeceu a Xerais, Libraría Ler, La Voz de Galicia e Barbantia a súa presenza na Tenda Escola e convidou a repetir este tipo de iniciativas no futuro.

Por parte de Xerais Edicións, o seu director, Manuel Bragado, falou da autora e da obra que se presentaba. Anunciou que o seu libro anterior, Cardume, co que Rexina Vega gañou o Xerais do 2007, xa foi traducido ao castelán. De Dark butterfly, apuntou que foi cualificada como novela heroica por parte da crítica, e que se trata dunha historia dura, pero romántica, que ten unha aparente sinxeleza, pero que non é tal. Engadiu que se trata dun libro vivo, vertebrado, de sangue quente. Tamén desvelou que está escrito en primeira persoa, detalle que cualificou de valente. Bragado avogou porque a lectura forme parte da axenda dos cidadáns e que os libros saian dos espazos convencionais, como estaba ocurrindo na Tenda Escola Deán.

Ecosistema delicado

Agustín Agra, en representación de Barbantia, empezou a súa intervención sinalando que «a cultura galega é un ecosistema moi delicado, con poucos elementos e en perigo, por iso este tipo de actos son moi importantes. Construír é difícil, destruír é doado», sinalou antes de referirse ao fito de acadar os 75 suplementos de A Voz de Barbantia «que achega e dá voz a moita xente».

O tamén escritor, apuntou que Rexina Vega é doutora en Filoloxía, profesora da Universidade de Vigo, especialista en Cunqueiro, tradutora, crítica literaria e que, ademais, sempre quixo ser escritora. Agra dixo que o argumento de Dark butterfly ten a súa orixe nunha irmá de Rexina Vega que era esquizofrénica e que morreu. Da novela, explicou que é unha metamorfose, un camiño irreversible dende que se entra no sanatorio; unha denuncia social, porque censura o desprezo, o tabú sobre os enfermos mentais: «É unha novela arriscada, chea de dor e de como fuxir del».

A preguntas de Agustín Agra, Rexina Vega explicou por que lle puxo o título en inglés. Sinalou que a bolboreta negra pretende representar a loucura, a morte, que é a metáfora central da novela. En canto ao enunciado en inglés, «porque o engano mental emprega a linguaxe para fuxir, inventa linguaxe», engadiu a autora de Vigo.

Tamén se interesou Agra pola escrita en primeira persoa: «Porque é ficción, senón sería máis caótica, máis fragmentaria, pero non é unha novela autobiográfica, nin tampouco para facela en terceira persoa», aclarou Vega.

O socio de Barbantia indagou da escritora se hai sentimento de culpa en Dark butterfly e Rexina dixo que supoñía que todo o mundo ten sentimento de culpa cando morre alguén querido, e máis se é un enfermo mental: «O enfermo mental acaba destruíndo as familias. As familias constrúen un escudo para defenderse do enfermo», manifestou a creadora.

Entre as fontes que empregou na novela, sinalou a Alejandra Pizarnik, que padecía un trastorno límite de personalidade; a Silvia Plath, que sufría un trastorno bipolar; e a Héctor Vallés, entre outros.

Como vén facendo Barbantia nos seus actos mensuais, para completar a cita coa cultura interveu en directo a mezzosoprano Lucía Vázquez, interpretando L? aura che spira, da ópera Giulio Cesare, de Haendel.


0 comentarios: