27 septiembre 2009

Barbantia apadriñou a primeira obra literaria de Manuel Mariño

O historiador sonense adéntrase na narrativa de ficción con «O peto de cartón».

A sala de reunións da casa de cultura de Porto do Son converteuse antonte en escenario da presentación do último libro do escritor Manuel Mariño. Barbantia apadriñou a primeira obra literaria dun autor que é xa un vello coñecido: «Xa colaboramos máis veces na publicación das obras etnográficas e históricas de Mariño» afirmou Alberto Piñeiro, coordinador da entidade cultural.

Na presentación, á que acudiron máis dun cento de persoas, estiveron presentes, ademais de Piñeiro e o propio Manuel Mariño, Patricia Torrado, estudante de Filosofía e amiga do escritor, e David González Couso, director de publicacións da editorial Toxosoutos, que se encarga do lanzamento e distribución da obra. Alberto Piñeiro foi o encargado de xustificar a ausencia das autoridades da vila: «O alcalde e os concelleiros tiveron que acudir ao pleno», afirmou.

Na súa intervención, o coordinador de Barbantia destacou que «esta é a primeira obra literaria de Mariño». O libro, que leva por nome O peto de cartón. Conversas cun vello mestre, fai un percorrido pola historia do galego ao longo dos séculos a través dos diálogos dun neno de 14 anos cun vello profesor. De pano de fondo, «está o mar, que representa a vida e a morte e que se mestura coa historia principal», remarcou Piñeiro.

Despois tocoulle a quenda a David González. O representante da editorial que xa publicou varias obras de Mariño, mostrou o seu compromiso «co traballo deste gran historiador». Tras a súa intervención, tomou a palabra Patricia Torrado quen, a través dunhas cantas preguntas, logrou que Manuel Mariño desvelase algunhas das claves da súa primeira novela ficticia.

Casualidades

O historiador explicou que o libro «é froito das casualidades», pois naceu hai máis de 20 anos da necesidade deste profesor de explicarlles aos seus alumnos a historia da lingua galega a través dos séculos. Tamén deixou claro que os primeiros destinatarios da súa obra «son os alumnos dos institutos e dos colexios». Por esta razón, a editorial Toxosoutos comprometeuse a estender O peto de cartón «polos centros educativos», como afirmou David González.

O coordinador de Barbantia aproveitou o acto de presentación para anunciar as datas das dúas próximas actividades culturais. O 16 de outubro é o día elixido para a presentación dun libro de Agustín Agra. O acto desenvolverase na casa cultural de Noia a partir das 20.30 horas.

O día 31 do mesmo mes terá lugar a presentación das últimas obras da escritora e xornalista Rosa Aneiros. Trátase das novelas Sol de inverno e Ás de bolboretas. Tamén detallou o programa de actividades do mes de novembro que estarán centradas en varias xornadas dedicadas á figura do tamén escritor Anxo Rei Ballesteros.

O acordeonista Carlos Peón foi o encargado de poñer fin á cerimonia de presentación coa interpretación dalgunhas pezas do seu repertorio.

La Voz de Galicia 27/9/2009

0 comentarios: